Úrslit Íslensku vefverðlaunanna!

Úrslit Íslensku vefverðlaunanna!

28.01.2017 12:03

Íslensku Vefverðlaunin voru afhent við hátíðlega athöfn í Silfurbergi Hörpunnar í gærkvöldi.

Hátt í fimmhundruð gestir mættu til að taka þátt í hátíðinni og fagna góðum árangri á síðasta starfsári með því að veita verðlaun í hinum ýmsum flokkum.

Meðal sigurvegara að þessu sinni var vefur Sinfóníuhljómsveitar Íslands sem var valinn Vefur ársins 2016, Sjóvá sigraði í flokki stærri fyrirtækja. Tix.is fékk verðlaun fyrir bestu vefverslunina og fitsuccess.is í flokki vefkerfa.

Mikil gróska er í vefiðnaðinum og má það best sjá á því hve vel unnir og vandaðir vefir eru framleiddir á Íslandi í dag. Sigurvegarar kvöldsins eru vel að verðlaununum komnir og óskum við þeim innilega til hamingju með frábæran árangur.

Dómnefnd Íslensku vefverðlaunna 2016 veitti að auki fjórar viðurkenningar fyrir fagleg vinnubrögð en þessar viðurkenningar voru veittar í fyrsta skipti þetta árið. Viðurkenningarnar sem um ræðir eru viðurkenning fyrir gott aðgengi í samstarfi við Birki Gunnarsson sérfræðingi í aðgengismálum, viðurkenning fyrir gott efni og innhald, viðurkenning fyrir framúrskarandi forritun og viðurkenning fyrir hreyfigrafík á vef.

Þeir vefir sem fengu viðurkenningar í ár eru

Fyrir - gott aðgengi á vef veitum við tvær viðurkenningar
Kópavogsbær
Netbanki Landsbankans

Fyrir - gott efni á vef
Sinfoníuhljómsveit Íslands

Fyrir - framúrskarandi forritun
Sprotarnir

Fyrir - hreyfigrafík á vef
Go digital

Sigurvegarar Íslensku vefverðlaunanna 2016:

Vefur ársins: sinfonia.is

Umsögn dómnefndar:

Dómnefnd átti í töluverðum erfiðleikum með að komast að niðurstöðu um hvaða vefur verðskuldaði titilinn besti íslenski vefurinn 2016. Þar sem keppnin um þennan titil var virkilega jöfn og hörð enda um marga góða vefi að ræða þetta árið.

Vefur ársins er svo sannarlega í takt við ímynd fyrirtækisins og styður hana vel. Vandað hefur verið til verka þvert á í öllu efni og er samspil þess afar vel útfært. Vefurinn veitir skemmtilegt innsæi í hvað fyrirtækið hefur upp á að bjóða með nýjum leiðum til að fanga athygli nýrra markhópa og kynslóða.

Á vef ársins slá allir þættir vefsins ….. í takt.

Hönnun & viðmót: ueno.co

Umsögn dómnefndar:

Frábær hönnun og notendaviðmót eru kjarninn í farsælu stafrænu verkefni. Framúrskarandi notendaviðmót snýst um skýrleika, stöðugleika og einfaldleika. Í ár vill dómnefndin sérstaklega verðlauna einn vef sem sýnir einmitt þetta, á svo fallegan hátt. Afraksturinn sýnir fram á framúrskarandi auga fyrir sjónrænum smáatriðum, einföldu leiðarkerfi, en um leið virkilega öfluga listræna stjórnun sem skapar einstaklega ljúfa notendaupplifun.

Fyrirtækjavefur (stærri): sjova.is

Umsögn dómnefndar:

Þessi vefur er gott dæmi um hvernig hægt er að taka nokkuð þurrt og tormelt viðfangsefni og setja það fram á einfaldan, skýran og áhugaverðan hátt. Notendaupplifunin er áreynslulaus, yfirsýn yfir helstu aðgerðir og þjónustu er til fyrirmyndar og myndefni og myndbönd glæði vefinn lífi. Þetta er endurhönnun og uppfærsla sem er til hreinnar fyrirmyndar.

Fyrirtækjavefur (smærri): sinfonia.is

Umsögn dómnefndar:

Vefurinn er einstaklega stílhreinn, vel uppbyggður og styður virkilega vel við ímynd fyrirtækisins. Greinilega hefur verið unnið vel í texta, myndefni og myndböndum, og er samspil þessara þátta vel útfært. Segja má að með þessum vef hafi fyrirtækið ekki bara fært sig nær nútímanum heldur líka nær markhópi sínum og greitt aðgang hans að þjónustu sinni og vörum.

Markaðsvefur ársins: Zero Financial

Umsögn dómnefndar:

Vel hannaður og stílhreinn vefur sem ber þess merki að nostrað hafi verið við hvert smáatriði. Framsetning efnis er frumleg og skemmtileg og einfaldleikinn er í fyrirrúmi. Áhersla hefur verið lögð á að upplifunin sé ekki síðri á snjallsíma sem er einstaklega ánægjulegt. Hreyfigrafík er virkilega vel unnin og setur punktinn yfir i-ið þegar kemur að notendaupplifun.

Vefkerfi ársins: fitsuccess.is

Umsögn dómnefndar:

Vefurinn er virkilega fallegur, vel hannaður og stútfullur af skemmtilegum fítusum. Allar aðgerðir eru skýrar sem gerir kerfið auðvelt í notkun fyrir bæði reynda og óreynda notendur. Ljóst er að mikil hugsun hefur farið í bæði hönnun og útfærslu sem skilar sér í ánægjulegri heildarupplifun. Vefurinn er kærkomin viðbót við flóru íslenskra vefja og kveikir í manni löngun til þess að gerast meðlimur og byrja í heilsuátaki.

Innri vefur ársins: Þjónustuvefur Ljósleiðarans

Umsögn dómnefndar:

Innri vefur er þjónustusvæði sem hugsað er fyrir starfsmenn fyrirtækja, hvort sem það sé til að miðla upplýsingum til starfsmanna eða tól sem nýtist starfi við þjónustu viðskipavina.

Innri vefur ársins að þessu sinni er stílhreinn og fallegur vefur með öflugum verkfærum til þess að geta þjónustað viðskiptavini sína á einfaldan hátt. Starfsmenn ættu að geta unað vel við innrakerfi Þjónustuvefs Ljósleiðarans.

Vefverslun ársins: Tix.is

Umsögn dómnefndar:

Vefurinn hefur á skömmum tíma skipað sér í sess stærstu vefverslana landsins. Einfaldur, aðgengilegur og vandaður eru orð sem lýsa vefnum vel. Yfirlit yfir vöruframboð er gott og kaupflæðið hraðvirkt og áreiðanlegt frá upphafi til enda. Nýjungar eins og tengingar við hraðgreiðslur (greiðsluöpp) hafa mælst vel fyrir og áður óséð virkni við sætaval er ágætlega útfært.

Vefapp ársins:L.is

Umsögn dómnefndar:

Vefapp ársins að þessu sinni er eitt öflugasta vefappið um þessar mundir. Eigendur þess hafa skýra stefnu að byggja upp vefapp frekar en app, þjónustufulltrúum þess til mikillar ánægju. Vefappið er ríkt af eiginleikum og með þægilegu viðmóti sem hentar slíku tóli. Það fær reglulega mikla ást og er uppfært af miklum móði. Það virkar einstaklega vel á snjallsímum og spjaldtölvum.

App ársins:kass

App ársins í ár er eitt af mörgum öppum á Íslandi í dag sem vilja einfalda peningalíf landsmanna. Appið er stílhreint og með skýrt viðmót sem sækir innblástur í viðmót Snapchats. Á snöggan máta er hægt að koma upp greiðslumiðlun einkalífsins. Appið getur tekið mynd af reikningi og skipt honum til að rukka vini þína. Og nýjasta nýtt, appið getur keypt miða hjá Tix.is.

Opinberi vefur ársins: hafnarfjordur.is

Umsögn dómnefndar:

Hlutverk opinberra vefja er að veita upplýsingar og þjónustu. Það er mat dómnefndar að virkilega vel hafi tekist til með vef Hafnarfjarðarbæjar. Hann er einfaldur og auðveldur í notkun, hann er vel upp byggður og leiðarkerfið skýrt.  Aðaláherslan er lögð á að mæta þörfum markhópsins, en helstu aðgerðir eru dregnar fram og jafnframt er öflug leit í forgrunni.

Efnis -og fréttaveita ársins: Umræðan - Umræðuvefur Landsbankans

Umsögn dómnefndar:

Innsendingar í þennan flokk voru mjög fjölbreyttar og afar ólíkar, en það var álit dómnefndar að ein þeirra skar sig greinilega úr hvað varðar hnitmiðaða og skýra framsetningu efnis. Þó að efnið sjálft sé að mörgu leiti fyrir tiltölulega þröngan markhóp, þá er ekki hægt að líta fram hjá því að þessi vefur er einstaklega stílhreinn, auðveldur í lestri og virkilega vel útfærður.

Samfélagsvefur ársins: krabbameinsfelagid.is

Þegar vefur fjallar um alvarleg málefni þá er mikilvægt að framsetning, viðmót og flæði sé einfalt og inni á milli skemmtilega útfært. Sigurvegaranum tekst frábærlega til með að gera fræðslu, ráðgjöf og almennar upplýsingar á aðgengilegan hátt á vef sem margir gætu þurft að nýta sér á eitthverjum tímapunkti á lífsleiðinni. Þetta er mikilvægur vefur sem kemur frá sér viðkvæmu málefni á skýran máta.

Val fólksins:sjova.is

Fagfólk og áhugafólk í vefbransanum var hvatt til þess að velja þann vef sem þeim þótti bestur á árinu, valið er opið en leitast er við að verðlauna vef sem þykir vera með áhugaverða nálgun á framsetningu efnis, notkun á tækni og uppbyggingu innihalds.

Viðurkenningar

Í ár var bryddað upp á þeirri nýbreytni að leita til félaga og áhugafólks í vefbransanum með tilnefningar til viðurkenninga fyrir vel unnin störf á árinu. Þetta árið voru viðurkenningar veittar fyrir EinstaklingsvefOpen source verkefni og Vefhetjur.

Einstaklingsvefur ársins er egillhardar.is

Ákveðið var að veita tvær viðurkenningar fyrir open source verkefni

Annars vegar APIs.is, en verkefnið opnar gagnasöfn sem eru til staðar á netinu og gerir þau aðgengileg fyrir forritara á þægilegan hátt. Verkefnið fór af stað árið 2012 en á bak við það standa Kristján Ingi Mikaelsson, Benedikt Valdez Stefánsson, Kristján Oddson og Kristjan Lund.

Hins vegar Tala.is fyrir framúrstefnulega nálgun á uppflettingu á íslenskum orðum og beygingum, sem myndi, með leyfi Árnastofnunar, hjálpa við að efla íslenska tungu á . David Blurton á heiðurinn að þessu framtaki.

Að lokum veitum við tvær vefhetju viðurkenningar til einstaklings og hóps.

Jónatan Arnar Örlygsson fyrir ötult starf í þágu menntunar á sviði vefiðnaðarins með Vefskólanum.

JSConf Iceland teymið fyrir að koma alþjóðlegri ráðstefnu á litla Ísland með tilheyrandi fjölbreytileika og tækifærum fyrir vefiðnaðinn.

Get neat CSS files with the new free online tool hosted by HTML Cleaner. Try it today!

SVEF á FacebookÁhugaverð umræða í Facebook hópnum


SVEF á Twitter Greinar og annað góðgæti á Twitter


SVEF á Vimeo Upptökur frá bjórkvöldum og Iceweb